ඉඩමක් මිලදී ගැනිමේ දී සැළකිලිමත් විය යුතු කරැණු

 ඉඩමක් මිලදී ගැනිමේ දී ඇති වූ ගැටළු සමූහය තුළ නිතර දකිනවා. ඒ නිසා හිතුනා ඉඩමක් මිලදී ගැනීමේ දී වැදගත් වන කරුණු කිහිපයක් ඉදිරිපත් කරන්න.

* මිල දී ගන්න බලාපොරොත්තු වන ඉඩමේ ඔප්පුවේ සහ පිඹුරේ (Plan) ඡායාස්ථ පිටපතක් අයිතිකරු ගෙන් ලබා ගන්න.

* එම ලේඛන නීතීඥවරයෙකුට හෝ නොතාරිස්වරයෙකුට ලබා දී ඉඩමට අදාල ඉඩම් ලියාපදිංචි කිරීමේ කාර්‍යාලයේ (Land Registry ) පත්ඉරු පරීක්ෂාවක් කර ගන්න.

*බැංකු ණය පහසුකමක් ලබා ගන්නවා නම් පත්ඉරු අවශ්‍ය වන නිසා අවුරුදු 30 කට අදාල පත්ඉරු ඉල්ලුම් කර ලබා ගැනීමට උපදෙස් දෙන්න.

* ඉඩම පිහිටි ස්ථානයට ගොස් මායිම් ආදිය බලන්න. එසේම අයිතිකරු පිළිබඳව අසල්වාසීන් ගෙන් විමසන්න. මොකද සමහරු ඉඩම ඇහැට නොදැක ඔප්පු ලියලා, ඉඩම බලන්න යද්දි එහෙම ඉඩමක් නැති වෙන අවස්ථා අධිකරණයේ දැකලා තීනවා.

*ඉඩමට අදාල පිඹුර වසර ගණනාවක් පැරණි නම් අලුතින් මැන පිඹුරක් ලබා දෙන ලෙස ඉඩම හිමිකරු ගෙන් ඉල්ලා සිටින්න.

* ඔප්පුව ලියන නීතීඥවරයා හෝ නොතාරිස්වරයා ගෙන් විකිණුම්කර ඔප්පුවේ දළ පිටපතක් (draft)ලබා ගෙන අදාල පළාත් ආදයම් කාර්‍යාලය වෙත ගොස් මුද්දර ගාස්තු පිළිබඳ මතය ලබා ගන්න. (මෙහිදී දළ පිටපතෙහි වටිනාකම දක්වන ස්ථාන හිස්ව තබා ගැනීමට වග බලා ගන්න.

* ඒ සඳහා විකිණුම්කර ඔප්පුවේ දළ පිටපත, පිඹුරේ පිටපත, අවසාන කාර්තුවේ වරිපනම් ගෙවීමට අදාල රිසිට්පතක්, ප්‍රධාන මාර්ගයේ සිට ඉඩමට ලඟා වන ආකරය දක්වන මාර්ග සිතියම, ඉඩම තුළ යම් ඉදි කිරීමක් වේ නම් ඊට අදාල ගොඩනැගිලි සැළැස්මේ පිටපතක් ගෙන යා යුතුය.

* අදාල තක්සේරු වටිනාකම දක්වා ඔප්පුව අත්සන් කළ පසු වැඩ අවසන් කළ ඔප්පුව ලියාපදිංචිය සඳහා ඉඩම් කාර්‍යාලයට යොමු කිරීමට පෙර පළාත් ආදායම් කාර්‍යාලයට මුද්දර ගාස්තු ගෙවූ ලදුපත සමග ඉදිරිපත් කර සහතික කරවා ගැනීමෙන් ගැටළු ඇති වීම වැළකේ.

* පළාත් ආදායම් කාර්‍යාංශය මගින් ලබා දෙන තක්සේරු වටිනාකම ගැණුම් මිලට වඩා ඉහළ අගයක් ගනී නම් කොමසාරිස් වරයා වෙත දිවුරුම් පෙත්සමක් මගින් කරුණු ඉදිරිපත් කර වටිනාකම සංශෝධනය කරවා ගත හැකිය.